दू गोडिय़ा...

आज तो दलदल में धंस गे हे, देख ले हमर पालनहार
रायपुर ले दिल्ली तक माते हे, दोगला-दलाली अउ भ्रष्टाचार.....

जेकर हाथ म दूध-रखवारी, उही लहुट जाथे रे बिलार
थाना-कछेरी म अब होथे, जुआ-चित्ती अउ बलात्कार....

राजनीति अब बेसिया बनगे, घर-घर हे वोकर लगवार
सत्-सेवा के मारग छूटगे, जइसे डोंगा हे बिन पतवार....

धरम-करम के पूंजी-पसरा, अब गांठ जमो छरियावत हे
ठग-जग बनगे पंडा-पुरोहित, साधु रोजी कमावत हे.....

हमर गली म कुकुर अबड़, बघवा सहीं हबकथें
राजनीति के लहू चिखे हें, जनता ल हांड़ा समझथें.....

गली-गली म अब तो होथे, हांव-हांव झिंकातानी
राजनीति के रूप बदलगे, चोरहा-लबरा चलाथें सियानी....

आगी लगगे कोइला म, डिजल-पेटरोल बिजरावत हे
महंगाई संग खांध जोर के, सरकार ठेंगा देखावत हे....

पद-पइसा अउ पावर खातिर, सबके नीयत डोलत हे
हरिश्चंद मन आज के देखौ, लबराबानी बोलत हें.....

परिया परत धान कटोरा, बंजर भुईं म लहुटत हे
मंत्री-संत्री खांध जोर के, अपनेच घर ल लूटत हे....

सोन-चिरइया फुदकय नहीं, पांखी-पांव कटागे हे
भ्रष्टतंत्र के राजशाही म, वोकर भाग नठागे हे.....

कइसे चलही देश के नइया, इही फिकर अबड़ होथे
त्राही-त्राही करत जनता, तीन धार के रोज रोथे.....

लम्हा-लम्हा तिलक लगाके, ढोंगी ढोल बजावत हे
धरम-करम ल जानय नहीं, जगतगुरु कहावत हे....

सुशील भोले
संजय नगर (टिकरापारा)  रायपुर (छ.ग.)
मोबा. नं. 080853-05931, 098269-92811
ब्लॉग -http://www.mayarumati.blogspot.in/
ईमेल - sushilbhole2@gmail.com
फेसबुक - https://www.facebook.com/kavisushil.bhole
यूट्यूब  -https://www.youtube.com/channel/UCJkmrUNIZo155cxuLV31rPQ/feed?activity_view=1