चंदा लुकागे....

ये बैरी, दिन आगे हावय बरसात के

चंदा लुकागे आधा रात के, कइसे खवावौं दूध-भात के....

कोन दिशा ले आथे बिलवा रे बादर
अइसे घपटथे जइसे सबले हे आगर
फेर पानी रितोथे जुड़वास के.....

जेठ-बइसाख ठउका जुगजुग ले दिखय
खेलत चंदैनी संग मुच-मुच करय
तभो बेरा निकालय मुलाकात के.....

खेती-किसानी तो गदबद ले मात गे हे
धनहा मन परी सहीं सुघ्घर सज गे हे
फेर मोर होगे बिरहा बिना बात के.....

   सुशील भोले

म.नं. 41-191, डॉ. बघेल गली,
संजय नगर (टिकरापारा) रायपुर (छ.ग.)
मोबा. नं. 080853-05931, 098269-92811
ईमेल - sushilbhole2@gmail.com