Friday 29 July 2016

नइ मिलय एको साथी...

कनिहा-कूबर टूट जही जब परही धरम के लाठी
गेंड़ी सही मचमचा जाही नइ बांचय कुछु लुआठी
का बात के भरम म तैं बोह डारे हस अभिमान ल
छिन भर बिलम फेर देख लेबे नइ मिलय एको साथी

सुशील भोले 
मो. नं. 9826992811

पहचान लेबे संगी...

बुझावत दीया के भभका ल पहचान लेबे संगी
बहुरूपिया बन आये हे, वोला जान लेबे संगी
टोरे हे कतकों सपना मूल निवासी के रूप धरे
बस वोकर मुखौटा के चिन्हा चिन्हान लेबे संगी

सुशील भोले
मो. नं. 9826992811

आगे हे हरेली...

हरियर भुइयां घन मातगे, आगे हे हरेली
नांगर-बक्खर के बुता उरकगे कुचरागे ढेली
अब जम्मो जिनिस ल सुघ्घर अस सजाबो
फेर कर पूजा-पाठ, चढ़ाबो नरियर भेली

सुशील भोले 
मो. नं. 9826992811


Tuesday 19 July 2016

खूबचंद बघेल स्मृति कवि सम्मेलन संपन्न...

छत्तीसगढ़ राज्य के स्वप्नदृष्टा डॉ. खूबचंद बघेल की जयंती के अवसर पर  18 जुलाई सोमवार को संध्या 7 बजे से आजाद चौक, रायपुर स्थित कुर्मी भवन के सभागार में विराट कवि सम्मेलन का आयोजन किया गया। इस आयोजन में सर्वश्री मीर अली मीर, ऋषि कुमार वर्मा, चोवाराम बादल, राजेन्द्र पाण्डेय, भवानी शंकर बेगाना, जागृति बघमार, शशि तिवारी एवं निशा तिवारी  ने अपनी कविताओं के माध्यम से लोगों को देर रात तक  गुदगुदाया। संचालन सुशील भोले ने किया...



Thursday 14 July 2016

तुतारी // आउट सोर्सिंग ले बहू...

छत्तीसगढ़ के राजनीति म अभी आउट सोर्सिंग शब्द के भारी चलन हे। सरकार ल रोज आउट सोर्सिंग ले कर्मचारी-अधिकारी लाने के बात म घेरे जाथे। फेर मजेदार बात ये हे के जे मन आउट सोर्सिंग के बात करथें, वोकरे मन के घर के कतकों बहू-बंद मन आउट सोर्सिंग ले आये हवयं। का आउट सोर्सिंग के नियम घर-परिवार, भाषा-संस्कृति अउ रिश्ता-नता म लागू नइ होवय?

सुशील भोले  
9826992811, 8085305931

Wednesday 13 July 2016

तुतारी // छत्तीसगढ़ी पहिरावा कब?

विश्व विद्यालय के दीक्षांत समारोह म विदेशी पहिरावा ल छोड़ के देशी पहिरावा के फैसला के स्वागत करे जा सकथे। फेर संग म ये सवाल घलो उठाये जा सकथे के देशी पहिरावा ल वो राज्य के अस्मिता अउ पहिरावा के मापदण्ड म होना चाही। अच्छा होतिस के रायपुर म होवइया दीक्षांत समारेह म धोती-कुर्ता के संग कोष्टउंहा पंछा के पगड़ी अउ नोनी मन अइसने लुगरा पहिनतीन।
सुशील भोले 
9826992811, 8085305931

Tuesday 12 July 2016

तुतारी // खेल मैदान ले मिलत खुशखबरी...


राज्य गठन के बाद ले छत्तीसगढ़ के खिलाड़ी मनला राष्ट्रीय-अंतर्राष्ट्रीय खेल म अपन जौहर देखाए के अच्छा अवसर मिलत हे। अभी रियो ओलंपिक खातिर महिला हॉकी टीम म राजनांदगांव के रेणुका यादव के नाम के घोषणा हमर मन बर गौरव के बात आय। नोनी ल एकर खातिर बधाई। एकर पहिली खो-खो के एशिया कप म इहां के एक नोनी गोल्ड मेडल जीत के घलो छत्तीसगढ़ ल गौरवान्वित होए के अवसर दिए रिहिस हे।

सुशील भोले  
9826992811, 8085305931

Friday 8 July 2016

तुतारी // बरसा के पानी ल हे छेंकना जरूरी...

हर बछर के गरमी म तरमरावत छत्तीसगढ़ ल बरसा के पानी ल छेंके के कुछू उदिम करना चाही। ए बछर मानसून के आये के बाद ले इहां पानी के गिरना अच्छा होवत हे। नंदिया-नरवा मन म जीवन आगे हे। ए जीवन ल लोगन के जीवन बनाना जरूरी हे। इहां छोटे-बड़े कुल मिलाके 39 नदिया-नरवा हे, फेर पानी के सही ठहराव नइ होय के सेती गरमी म तालाबेली हो जाथे। सरकार ल छोटे-छोटे बांध के माध्यम ले हर नंदिया के पानी ल छेंके के उदिम करना चाही।

सुशील भोले  
9826992811, 8085305931

तुतारी // मौसमी बीमारी के महामारी...

हर मौसम के बदलाव के संग रोग-राई के शिकायत मिलबे करथे। फेर बरसात के दिन म एकर बढ़वार जादा देखे बर मिलथे। चारोंमुड़ा के अस्पताल मन म अभी ले लोगन के भीड़ दिखे बर धर लिए हे। फेर सरकारी अस्पताल मन म दवई-पानी के कमी के खबर घलो संग म आवत हे। इहां के कतकों गांव मन अभी ले डॉक्टर अउ अस्पताल के दर्शन नइ कर पाये हे, भले सरकार कुछू भी दावा करत राहय।

सुशील भोले  
9826992811, 8085305931

Thursday 7 July 2016

तुतारी // इतिहास लेखन के सच्चाई...

छत्तीसगढ़ म अभी जइसन किसम के इतिहास लेखन होवत हे, वोकर ऊपर विश्वास करना मुश्किल होए अस लागथे। बाहिर ले आये कथित विद्वान मन बाहरीच ग्रंथ अउ संदर्भ के आधार म छत्तीसगढ़ ल परिभाषित करत हें। दुनिया के इतिहास के मानक उहां के मूल निवासी मन होथे। इहां के मूल निवासी मन के  मानक म कब इतिहास अउ संस्कृति ल लिखे जाही, ए बात के अगोरा हे।

सुशील भोले  
9826992811, 8085305931

Wednesday 6 July 2016

तुतारी // 'स्वाभिमान" अब नइ रिहिस...?

क्षेत्रीय दल 'स्वाभिमान मंच" ल पहिली बेर वोकर संस्थापक के बेटा बोरे रिहिसे, अउ अब बांचे-खोचे ल नवा-नेवरिया बने अध्यक्ष ह बोर दिस। माने अब 'स्वाभिमान" नइ रिहिस। 'स्वाभिमानी" मन पहिली भजपा के सरन म गेइन, अब के मन कांग्रेस के जोगी संस्करन म हमागे हें। कुल मिला के क्षेत्रीय दल के मूल स्वरूप अउ उद्देश्य राष्ट्रीय पार्टी वाले मन के छइहां म थिरागे, सिरागे...

सुशील भोले  
9826992811, 8085305931

Monday 4 July 2016

तुतारी // विधानसभा म छत्तीसगढ़ी...

देश के अधिकांश राज्य के विधानसभा म उहां के मातृभाषा म ही सबो काम-काज होथे। मंत्री-विधायक मन उहां के जनभाषा म ही आपसी संवाद करथें, बहस करथें। फेर छत्तीसगढ़ एक अइसन राज्य आय जिहां के विधानसभा म अइसन देखे बर नइ मिलय। ए राज के सरकार कहे बर तो छत्तीसगढ़ी ल प्रदेश स्तर म राजभाषा के दरजा दे दिए हे। राजभाषा आयोग के स्थापना कर दिए हे, फेर सब देखाए भर के हे। इही सबला देखत अवइया 11 जुलाई दिन सोम्मार के बिहनिया 10 ले 12 बजे तक इहां के महतारी भाखा के मयारुक मन छत्तीसगढ़ विधानसभा भवन के आगू म जम्मो विधायक मनला छत्तीसगढ़ी म गोठियाए खातिर उदिम करहीं। आपो मनले अरजी हे जादा ले जादा संख्या म अपन हाजिरी दे के उदिम करहू।

सुशील भोले
9826992811, 8085305931

Sunday 3 July 2016

तुतारी // विधायक ल सबक...

राजनीति के चस्का लगते लोगन लबारी मारे, ठगे, भुलवारे म मगन हो जाथें। अइसन मनला सबक सिखाए बर बस्तर के झाड़उमर गांव के मन ठउका उपाय निकालिन। गांव म बोरिंग लगवाए बर विधायक ल घेरी-भेरी अरजी करंय फेर विधायक धियाने नइ देवय। गांव के मन वोला चिढ़ाए बर लकड़ी के बोरिंग बना के चार-पांच जगा गडिय़ा दिन अउ वोकर उद्घाटन करे बर विधायक ल बलाइन। विधायक लाज के मारे आइस तो नहीं फेर गांव म एक ठन बोरिंग जरूर लगवा दिस।

सुशील भोले
9826992811, 808530593

तुतारी // अंजोर या अंधियार छत्तीसगढ़...

देश भर के जुरियाये कलेक्टर मन के बइठका म मुख्यमंत्री जी काहत रिहिन हें- छत्तीसगढ़ म बिजली सरप्लस हे। इहां के दुकान मन म अब मोमबत्ती बेचाना बंद होगे हे। शहर, गांव, फैक्टरी, खेती सबो म अंजोर के डेरा हे। राजधानी रायपुर ले लगे कतकों गांव के लोगन काहत रिहिन हें- का करबे भइया बिजली कतका बेर आथे, कतका बेर जाथे, तेकर ठिकाना नइए। इहां के कतकों गांव तो अइसन हे, जिहां आज तक बिजली के दर्शन घलो नइ होए हे।

सुशील भोले
9826992811, 808530593

तुतारी // सच या साजिश...?

बिलासपुर आईजी के संबंध म एक महिला आरक्षक ले संबंधित जइसन खबर आवत हे, वोमा कतका सच्चाई या साजिश हे, ये तो जांच के बाद पता चलही। फेर एक बात जरूर हे के ये विभाग के कतकों कर्मचारी-अधिकारी अपन आप ल कानून ले ऊपर समझथें, कतकों किसम के गैर कानूनी काम म लगे रहिथें। एकर सेती कोन कतका दूध के धोए हे एला कहना अभी सही नइए।

सुशील भोले
9826992811, 808530593